NA SHAFE WATANNI UKU A MASANA’ANTAR FINA-FINAN BATSA, NA SAMU $12,000, AMMA NA RASA IKON SARRAFA HOTUNANA FIYE DA SHEKARA 10

 Tsohuwar jarumar fina-finan batsa, Mia Khalifa, ta bayyana yadda shiga masana’antar fina-finan batsa na tsawon watanni uku kacal ya ci gaba da shafar rayuwarta, duk da cewa ta bar sana’ar sama da shekaru goma da suka gabata.

Mia, wadda aka haifa a Beirut, babban birnin Lebanon, ta koma Amurka tun tana ƙarama. Ta shiga masana’antar fina-finan batsa a watan Oktoban 2014, tana da shekaru 21. Ta shahara a duniya bayan fitowar wani bidiyo da ta sanya hijabi a ciki, lamarin da ya jawo ce-ce-ku-ce da suka daga sassa daban-daban na duniya, musamman a Gabas ta Tsakiya.

A cewarta, sakamakon wannan mataki ya wuce sukar da ake yi mata a kafafen sada zumunta. Ta bayyana cewa danginta sun nisanta kansu da ita, yayin da ita kuma ta fuskanci barazanar kisa, ciki har da wani saƙon hoto mai ban tsoro da ta danganta da ƙungiyar ISIS.

Mia ta ce a lokacin tana ƙarama, ba ta da cikakkiyar masaniya kan irin tasirin da wannan sana'a za ta iya yi wa rayuwarta a nan gaba. Ta kuma bayyana cewa akwai lokutan da ta ji ana matsa mata wajen yanke wasu shawarwari da ba ta gamsu da su ba.

Ta ce ta shafe kusan watanni uku kacal a masana'antar, inda ta samu kuɗi kusan dala 12,000.

Sai dai babban abin da ta ce har yanzu ke damunta shi ne rashin ikon sarrafa bidiyoyin da ta fito a cikinsu. A cewarta, duk da barin sana'ar tun shekaru da dama da suka wuce, bidiyoyin na ci gaba da yawo a intanet saboda haƙƙin amfani da su yana hannun kamfanin da ta yi aiki da shi.

Labarin Mia Khalifa ya sake tayar da muhawara kan illolin shiga masana'antar fina-finan batsa, kare haƙƙin ma'aikata, yarjejeniyoyin aiki da kuma yadda shawarar da mutum ya yanke a lokacin ƙuruciya za ta iya yin tasiri ga rayuwarsa na tsawon shekaru.