Yan ta’adda sun halaka shahararriyar jarumar TikTok Mariam Cissé saboda goyon bayan sojojin Mali — gwamnati ta ce ba za ta ja da baya ba.cikakken labarin👇

Masu da’awar jihadi da ke da iko a yankin arewacin Mali sun kashe shahararriyar mai TikTok, Mariam Cissé, a bainar jama’a a birnin Tonka, wanda ke cikin yankin Tombouctou.

Rahotanni sun nuna cewa an yi wannan aika-aika ne saboda ta bayyana goyon bayanta ga dakarun gwamnati da ke yaƙi da ‘yan ta’adda a yankin.

Mariam Cissé, wacce ke da mabiya fiye da 100,000 a TikTok, ta kasance sananniya wajen yada sakonnin ƙarfafa gwiwa da goyon baya ga sojojin Mali.

Kisan nata ya tayar da hankalin jama’a da kuma fushin gwamnatin mulkin soja, wacce ta fitar da sanarwa tana cewa:
Ba za mu taɓa ja da baya ba wajen yaƙar ta’addanci, kuma irin wannan aika-aika ba zai taɓa razana mu ba.”

A halin yanzu, hukumomin tsaro na Mali suna ƙara tsaurara matakan tsaro a yankin Tombouctou da kewaye domin kama waɗanda suka aikata wannan danyen aiki.